2027 సంక్రాంతి సినిమా సందడి ఇప్పటి నుంచే మొదలైంది. పండుగకు ఇంకా కొన్ని నెలల సమయం ఉన్నప్పటికీ పలువురు స్టార్ హీరోలు తమ సినిమాల విడుదల తేదీలను ప్రకటించడంతో టాలీవుడ్లో ఆసక్తి పెరిగింది. రవితేజ, చిరంజీవి, వెంకటేశ్, శర్వానంద్ వంటి ప్రముఖ హీరోల సినిమాలు ఒకే సమయంలో థియేటర్లలోకి రాబోతుండటంతో వచ్చే సంక్రాంతి బాక్సాఫీస్ పోరు ఆసక్తికరంగా మారనుంది. తాజాగా ‘ఇరుముడి’తో విజయాన్ని అందుకున్న మాస్ రాజా రవితేజ తన తదుపరి చిత్రాన్ని ప్రారంభించేందుకు సిద్ధమవుతున్నారు. హసిత్ గోలి దర్శకత్వంలో దిల్ రాజు నిర్మిస్తున్న ఈ చిత్రానికి ‘దాగుడుమూతల దండాకోర్’ అనే టైటిల్ను పరిశీలిస్తున్నట్లు సమాచారం. ఈ సినిమాను 2027 జనవరి 14న విడుదల చేయనున్నట్లు తెలుస్తోంది.
సంక్రాంతి హడావుడికి ముందుగానే జనవరి 8న ‘మహాకాళి’ ప్రేక్షకుల ముందుకు రానుంది. ప్రశాంత్ వర్మ సినిమాటిక్ యూనివర్స్లో భాగంగా రూపొందుతున్న ఈ చిత్రానికి పూజా అపర్ణ దర్శకత్వం వహిస్తున్నారు. భూమి శెట్టి టైటిల్ పాత్రలో కనిపించనుండగా, అక్షయ్ ఖన్నా శుక్రాచార్యుడి పాత్రలో నటిస్తున్నట్లు సమాచారం. మరోవైపు జనవరి 12 నుంచి అసలు సంక్రాంతి సినిమా సందడి మొదలుకానుంది. వెంకటేశ్, కళ్యాణ్ రామ్, అనిల్ రావిపూడి కాంబినేషన్లో తెరకెక్కుతున్న చిత్రం ఆ రోజున విడుదల కానుంది. అనిల్ రావిపూడి ప్రతి సంక్రాంతికి తన సినిమాతో ప్రేక్షకులను పలకరించే సెంటిమెంట్ను కొనసాగిస్తుండటంతో ఈ సినిమాపై అంచనాలు ఉన్నాయి.
వెంకటేశ్ సినిమా విడుదలైన మరుసటి రోజే మెగాస్టార్ చిరంజీవి నటిస్తున్న ‘కాకా’ థియేటర్లలోకి రానుంది. దీంతో జనవరి 12న విడుదల కావాల్సిన సాయి దుర్గ తేజ్ ‘సంబరాల ఏటిగట్టు’ వాయిదా పడే అవకాశాలపై టాలీవుడ్లో చర్చ జరుగుతోంది. అయితే దీనిపై అధికారికంగా స్పష్టత రావాల్సి ఉంది. ఒకే వారంలో వరుసగా భారీ సినిమాలు విడుదల కావడంతో థియేటర్ల కేటాయింపులు కీలకంగా మారనున్నాయి. స్టార్ హీరోల సినిమాలకు స్క్రీన్లను ఎలా పంచుతారనే అంశం కూడా బాక్సాఫీస్ ఫలితాలపై ప్రభావం చూపే అవకాశం ఉంది.
ఇక శర్వానంద్ కూడా సంక్రాంతి సెంటిమెంట్ను కొనసాగిస్తూ మరోసారి పండుగ బరిలోకి దిగుతున్నారు. గతంలో ‘శతమానం భవతి’, ‘ఎక్స్ప్రెస్ రాజా’ వంటి సినిమాలతో సంక్రాంతి విజయాలను అందుకున్న ఆయన, తాజాగా ‘నారి నారి నడుమ మురారి’తోనూ మంచి ఫలితాన్ని అందుకున్నారు. ఇప్పుడు శ్రీను వైట్ల దర్శకత్వంలో తెరకెక్కుతున్న ‘జార్జ్ క్రిష్’ చిత్రాన్ని జనవరి 14న విడుదల చేయనున్నట్లు ప్రకటించినట్లు సమాచారం. దీంతో జనవరి 14న రవితేజ సినిమా, శర్వానంద్ సినిమా మధ్య కూడా పోటీ ఉండనుంది. వరుసగా విడుదల తేదీలు ఖరారవుతుండటంతో నిర్మాతలు కూడా తమ సినిమాల ప్రమోషన్పై ముందుగానే దృష్టి పెట్టాల్సిన పరిస్థితి ఏర్పడింది.
మొత్తంగా జనవరి 8 నుంచి 14 వరకు పలు ఆసక్తికరమైన సినిమాలు థియేటర్లలోకి రాబోతుండటంతో 2027 సంక్రాంతి బాక్సాఫీస్ వార్ ఇప్పటి నుంచే హాట్ టాపిక్గా మారింది. ముఖ్యంగా జనవరి 12 నుంచి 14 మధ్య స్టార్ హీరోల సినిమాలు వరుసగా విడుదల కానుండటం ప్రేక్షకులకు పండుగను మరింత ప్రత్యేకంగా మార్చనుంది. థియేటర్ల కేటాయింపు, ప్రేక్షకుల ఆదరణ, ఓపెనింగ్స్, వసూళ్ల విషయంలో ఈ సినిమాల మధ్య పోటీ ఎలా ఉండబోతుందో చూడాలి. ముఖ్యంగా సంక్రాంతి సీజన్లో వరుస విజయాలు సాధించిన అనిల్ రావిపూడికి ఈసారి బలమైన పోటీ ఎదురుకానుందని సినీ వర్గాల్లో చర్చ జరుగుతోంది. చివరికి ఏ సినిమాకు ప్రేక్షకులు పట్టం కడతారో తెలుసుకోవాలంటే 2027 సంక్రాంతి వరకు వేచి చూడాల్సిందే.
