మెగా పవర్ స్టార్ రామ్ చరణ్ హీరోగా, దర్శకుడు బుచ్చిబాబు సానా కాంబినేషన్లో రూపొందుతున్న పాన్-ఇండియా చిత్రం ‘పెద్ది’ (Peddi) ఇప్పటికే భారీ అంచనాల మధ్య ఉంది. ఈ సినిమాకు సంగీతం అందిస్తున్నది ఆస్కార్ విజేత ఏఆర్ రెహమాన్ కావడం ప్రత్యేక ఆకర్షణగా మారింది. దాదాపు ఎనిమిదేళ్ల విరామం తర్వాత రెహమాన్ నేరుగా ఒక పూర్తి స్థాయి తెలుగు సినిమాకు పనిచేస్తుండటంతో అభిమానులు, ఇండస్ట్రీ వర్గాలు ఎంతో ఆసక్తిగా ఎదురుచూస్తున్నాయి.
ఇప్పటికే ‘పెద్ది’ నుంచి విడుదలైన ‘చికిరి చికిరి’ పాట సోషల్ మీడియాలో సెన్సేషన్గా మారింది. రెహమాన్ మార్క్ మెలోడీ, వినూత్న బీట్లు, లిరిక్స్ కలయిక ప్రేక్షకులను విపరీతంగా ఆకట్టుకుంది. ఈ ఒక్క పాటతోనే సినిమాపై అంచనాలు మరింత పెరిగాయి. ముఖ్యంగా యువతలో ఈ పాటకు వస్తున్న రెస్పాన్స్, రెహమాన్ టాలీవుడ్లో సెకండ్ ఇన్నింగ్స్ను గట్టిగా ప్రారంభించారనే భావనను కలిగిస్తోంది.
‘పెద్ది’తో వచ్చిన క్రేజ్ను చూసిన టాలీవుడ్ మేకర్స్ ఇప్పుడు రెహమాన్ డేట్స్ కోసం ప్రయత్నాలు మొదలుపెట్టినట్లు సమాచారం. ఇందులో భాగంగా మెగాస్టార్ చిరంజీవి – దర్శకుడు బాబీ కొల్లి కాంబినేషన్లో తెరకెక్కబోయే ‘Mega158’ ప్రాజెక్ట్కు రెహమాన్ సంగీతం ఖరారైనట్లు వార్తలు వినిపిస్తున్నాయి. మాస్ ఎంటర్టైనర్గా రూపొందనున్న ఈ చిత్రానికి రెహమాన్ బ్యాక్గ్రౌండ్ స్కోర్, పాటలు ప్రధాన హైలైట్గా నిలుస్తాయని అంచనా.
ఇదే కాకుండా యూత్ ఐకాన్ విజయ్ దేవరకొండ హీరోగా, విక్రమ్ కుమార్ దర్శకత్వంలో యూవీ క్రియేషన్స్ నిర్మించనున్న భారీ ప్రాజెక్ట్కూ రెహమాన్ పేరు పరిశీలనలో ఉందని టాక్. గతంలో విక్రమ్ కుమార్ తెరకెక్కించిన ‘24’ సినిమాకు రెహమాన్ ఇచ్చిన ఆల్బమ్ ఇప్పటికీ గుర్తుండిపోతుంది. ఆ విజయవంతమైన కాంబినేషన్ మళ్లీ రిపీట్ అయితే టాలీవుడ్కు మరో మ్యూజికల్ ట్రీట్ ఖాయం అని అభిమానులు భావిస్తున్నారు.
ఈ ప్రాజెక్ట్లన్నీ 2026లో విడుదలయ్యే అవకాశాలు ఉండటంతో, వచ్చే ఏడాది టాలీవుడ్ బాక్సాఫీస్పై రెహమాన్ ప్రభావం స్పష్టంగా కనిపించనుంది. తన విలక్షణమైన స్వరాలు, కొత్తదనం కలిగిన సంగీతంతో సెకండ్ ఇన్నింగ్స్లోనూ రెహమాన్ టాప్ స్థానాన్ని నిలబెట్టుకుంటారా అనే ఆసక్తి నెలకొంది. రెహమాన్ మార్క్ సంగీతం తోడైతే సినిమాలకు బాక్సాఫీస్ వద్ద పూనకాలు ఖాయమని ఫ్యాన్స్ నమ్ముతున్నారు.
