ఏపీలో జాతీయ రహదారుల (ఎన్హెచ్) నెట్వర్క్ అభివృద్ధికి కేంద్ర ప్రభుత్వం నిరంతరంగా నిధులు కేటాయిస్తున్నందుకు కేంద్ర రహదారులు, రవాణా శాఖ మంత్రి నితిన్ గడ్కరీకి ముఖ్యమంత్రి చంద్రబాబు నాయుడు కృతజ్ఞతలు తెలిపారు. రాష్ట్ర అభివృద్ధిలో మౌలిక వసతులు కీలకమైనవని పేర్కొన్న సీఎం, రహదారుల విస్తరణతో పాటు కొత్త ప్రాజెక్టులకు కేంద్రం ఇస్తున్న మద్దతు అభినందనీయమన్నారు. ఈ సహకారం వల్ల రాష్ట్ర ఆర్థిక ప్రగతికి మరింత ఊపొస్తుందని ఆశాభావం వ్యక్తం చేశారు.
రాష్ట్రంలో జాతీయ రహదారుల నెట్వర్క్ను బలోపేతం చేయడంలో కేంద్రం కీలక పాత్ర పోషిస్తోందని చంద్రబాబు పేర్కొన్నారు. ఈ విషయాన్ని సామాజిక మాధ్యమం ‘ఎక్స్’ వేదికగా వెల్లడిస్తూ, కేంద్ర మంత్రి నితిన్ గడ్కరీని ట్యాగ్ చేశారు. రహదారుల నిర్మాణం, విస్తరణ పనుల్లో రాష్ట్ర ప్రభుత్వం పూర్తి సహకారం అందిస్తుందని స్పష్టం చేశారు. కేంద్ర–రాష్ట్ర సమన్వయంతోనే అభివృద్ధి లక్ష్యాలు సాధ్యమవుతాయని ఆయన అభిప్రాయపడ్డారు.
అభివృద్ధి చెందుతున్న గ్రీన్ఫీల్డ్ పోర్టులతో పాటు ఇప్పటికే ఉన్న పోర్టులకు మెరుగైన కనెక్టివిటీ కల్పించడంపై కేంద్రం ప్రత్యేక దృష్టి పెట్టడంపై సీఎం హర్షం వ్యక్తం చేశారు. ముఖ్యంగా మచిలీపట్నం పోర్ట్ కనెక్టివిటీ ప్రాజెక్ట్ ఆంధ్రప్రదేశ్కు అత్యంత కీలకమని ఆయన అన్నారు. ఈ ప్రాజెక్ట్ ద్వారా రాష్ట్ర వాణిజ్యం, ఎగుమతులు మరింత పెరుగుతాయని అభిప్రాయపడ్డారు.
హింటర్ల్యాండ్ ప్రాంతాల నుంచి పోర్టులకు సులభమైన రహదారి లింకేజీ ఏర్పడితే లాజిస్టిక్స్ ఖర్చులు గణనీయంగా తగ్గుతాయని చంద్రబాబు వివరించారు. దీని వల్ల పరిశ్రమలు, ఎగుమతిదారులు మాత్రమే కాకుండా రైతులు, వ్యాపారులు కూడా లాభపడతారని అన్నారు. రాష్ట్రాన్ని లాజిస్టిక్స్, ఇండస్ట్రియల్ హబ్గా తీర్చిదిద్దే దిశగా ఇది కీలక అడుగుగా నిలుస్తుందని చెప్పారు.
ఇటీవల కేంద్ర మంత్రి నితిన్ గడ్కరీ మచిలీపట్నం పోర్టుకు NH-65, NH-216 జంక్షన్ నుంచి 6-లేన్ రహదారి నిర్మాణానికి రూ.573.77 కోట్ల నిధులు మంజూరు చేసినట్లు ప్రకటించారు. ఈ ప్రాజెక్ట్ ద్వారా ట్రాఫిక్ కంజెస్టన్ తగ్గడమే కాకుండా, ఫ్రైట్ టర్న్ అరౌండ్ టైమ్ కూడా గణనీయంగా తగ్గుతుందని కేంద్రం వెల్లడించింది. ఈ నిర్ణయం రాష్ట్ర అభివృద్ధికి మరింత ఊతమిస్తుందని సీఎం చంద్రబాబు నాయుడు విశ్వాసం వ్యక్తం చేశారు.
