మాస్ మహారాజా రవితేజ తన కొత్త చిత్రంతో మరోసారి ప్రేక్షకులను అలరించేందుకు సిద్ధమవుతున్నాడు. ఇటీవలే విడుదలైన మాస్ జాతర సినిమాతో అభిమానులను పెద్దగా ఆకట్టుకోలేకపోయిన రవితేజ, ఇప్పుడు తన తదుపరి ప్రాజెక్ట్పై దృష్టి సారించాడు. ప్రస్తుతం ఈ చిత్రానికి సంబంధించిన పాట చిత్రీకరణ హైదరాబాదులోని అన్నపూర్ణ స్టూడియోస్లో జరుగుతోంది. ఈ పాట కోసం ప్రత్యేకంగా భారీ కలర్ఫుల్ సెట్ను నిర్మించగా, అక్కడ సందడిగా షూటింగ్ జరుగుతోంది.
ఈ చిత్రంలో రవితేజ సరసన ఆషికా రంగనాథ్ హీరోయిన్గా నటిస్తోంది. మాస్ ఆడియెన్స్ను దృష్టిలో ఉంచుకుని రూపొందిస్తున్న ఈ పాటకు ప్రముఖ కొరియోగ్రాఫర్ శేఖర్ మాస్టర్ నృత్యదర్శకత్వం వహిస్తున్నారు. సెట్లో అద్భుతమైన లైటింగ్, అందమైన బ్యాక్డ్రాప్స్తో ఈ పాటను మేకర్స్ భవ్యంగా చిత్రీకరిస్తున్నారు. రవితేజ ఎనర్జీ, ఆషికా అందం కలగలిపి ఈ పాటను మరింత ఆకర్షణీయంగా మలుస్తుందనే నమ్మకం టీమ్లో కనిపిస్తోంది.
ఈ చిత్రాన్ని కిశోర్ తిరుమల దర్శకత్వం వహిస్తుండగా, ఎస్.ఎల్.వి సినిమాస్ పతాకంపై సుధాకర్ చెరుకూరి నిర్మిస్తున్నారు. కథ పరంగా ఈ చిత్రం భావోద్వేగాలకు, ఫ్యామిలీ ఎంటర్టైన్మెంట్కు ప్రాధాన్యం ఇస్తూ రూపొందుతోందని సమాచారం. కిశోర్ తిరుమల దర్శకత్వం వహించిన గత చిత్రాలు ప్రేక్షకుల హృదయాలను గెలుచుకున్నందున, రవితేజతో ఆయన కాంబినేషన్పై మంచి అంచనాలు ఉన్నాయి.
సినిమాకు సంగీతాన్ని భీమ్స్ సిసిరోలియో అందిస్తున్నారు. ఆయన గతంలో రవితేజ చిత్రాలకు ఇచ్చిన మాస్ బీట్లు మంచి హిట్ అయ్యాయి కాబట్టి, ఈసారి కూడా పాటలు చార్ట్బస్టర్గా నిలుస్తాయని అభిమానులు ఆశిస్తున్నారు. ఈ సినిమా రవితేజ కెరీర్లో కొత్త ఉత్సాహాన్ని నింపుతుందనే నమ్మకం ఫ్యాన్స్లో ఉంది.
ఇప్పటికే పలు షెడ్యూల్స్ పూర్తి చేసుకున్న ఈ చిత్రం త్వరలోనే ముగింపు దశకు చేరుకోనుంది. రవితేజ కొత్త లుక్లో, కొత్త స్టైల్లో ప్రేక్షకుల ముందుకు రావడానికి సిద్ధమవుతున్నాడు. గత కొన్నేళ్లుగా సరైన హిట్ కోసం ఎదురుచూస్తున్న మాస్ మహారాజాకు ఈ సినిమా విజయాన్ని అందిస్తుందేమో అన్న ఉత్కంఠ అందరిలో ఉంది.
