ఆస్ట్రేలియా పర్యటనలో భాగంగా ఐదవ రోజు నేను టాస్మానియా విశ్వవిద్యాలయం (University of Tasmania – UTAS)ను సందర్శించే అవకాశం లభించింది. ఈ యాత్రలో భాగంగా ఆంధ్రప్రదేశ్ అభివృద్ధి, విద్యా రంగం, ఆరోగ్య రంగాల్లో అంతర్జాతీయ భాగస్వామ్యాలను పెంపొందించాలనే లక్ష్యంతో పలు సమావేశాలు నిర్వహించాం. టాస్మానియా విశ్వవిద్యాలయం ఆస్ట్రేలియాలో అత్యున్నత విద్యాసంస్థల్లో ఒకటిగా పేరుపొందింది.
ఈ సందర్భంగా యూనివర్సిటీ డిప్యూటీ వైస్ ఛాన్సలర్ (అకడమిక్) ప్రొఫెసర్ నటాలీ బ్రౌన్ గారు మరియు స్కూల్ ఆఫ్ ఫార్మసీ అండ్ ఫార్మకాలజీ అధిపతి ప్రొఫెసర్ గ్లెన్ జాకబ్సన్ గారితో విశదంగా చర్చించాను. ఫార్మసీ మరియు పారామెడికల్ విద్యలో ఆధునిక బోధనా విధానాలు, పరిశోధనావకాశాలు, మరియు గ్లోబల్ ప్రమాణాలపై అవగాహన పెంచుకునే దిశగా ఈ సమావేశం ఎంతో ఫలప్రదంగా సాగింది.
ఏపీలో ఫార్మసీ మరియు పారామెడికల్ కోర్సులకు ప్రపంచ ప్రమాణాలకు అనుగుణమైన పాఠ్య ప్రణాళికలు రూపొందించేందుకు టాస్మానియా విశ్వవిద్యాలయం సాంకేతిక, అకడమిక్ సహకారం అందించాలని నేను కోరాను. విద్యార్థులు గ్లోబల్ స్థాయిలో పోటీ పడగల నైపుణ్యాలను పొందేలా ఈ భాగస్వామ్యం ఎంతో ఉపయోగకరంగా ఉంటుంది.
అలాగే గ్రామీణ ఆరోగ్య సంరక్షణ, తాగునీటి సరఫరా, గిరిజన ప్రాంతాల్లో వైద్య సదుపాయాల అభివృద్ధి వంటి రంగాల్లో ఉభయ సంస్థలు కలిసి పనిచేయాలనే అంశంపై చర్చించాం. ఈ రంగాల్లో పరిశోధనలకు టాస్మానియా విశ్వవిద్యాలయం మద్దతు ఇవ్వాలని అభ్యర్థించాను. అటువంటి అంతర్జాతీయ పరిశోధన సహకారాలు రాష్ట్ర ప్రజల జీవన ప్రమాణాలను మెరుగుపరచడంలో ముఖ్య పాత్ర పోషిస్తాయి.
ఈ పర్యటన ద్వారా ఆంధ్రప్రదేశ్కి కొత్త అవకాశాలు తెరవబడుతున్నాయి. విద్య, ఆరోగ్య, పరిశోధన రంగాల్లో నాణ్యతా మార్పు సాధించడానికి విదేశీ సంస్థలతో భాగస్వామ్యం ఎంతో అవసరం. టాస్మానియా యూనివర్సిటీ వంటి ప్రతిష్టాత్మక విద్యాసంస్థల సహకారం ఏపీలో మానవ వనరుల అభివృద్ధి దిశగా ఒక కొత్త దిశ చూపుతుంది.
