నా ఐదు దశాబ్దాల రాజకీయ జీవితంలో నేటి రోజు మరిచిపోలేని చారిత్రక ఘట్టంగా నిలిచిపోతుంది. ఎన్నో కష్టాలు, అడ్డంకులు, వ్యయప్రయాసలు ఎదుర్కొంటూ, చివరికి నా గడ్డ కుప్పంలో కృష్ణమ్మ జలాలు పారడం నాకు అపారమైన ఆనందాన్ని ఇచ్చింది. ఇది సాధ్యం కావడానికి ఎన్నో సంవత్సరాల కృషి, పట్టుదల, దృఢనిశ్చయం కారణమైంది.
1999లో నా చేతుల మీదుగా హంద్రీ-నీవా ప్రాజెక్టుకు శ్రీకారం చుట్టిన రోజే ఈ కలను సాకారం చేయాలనే సంకల్పం చేసుకున్నాను. ఆ దశ నుంచి ఈ రోజు వరకు, ఎన్నో అవాంతరాలు ఎదురైనా వెనుకడుగు వేయలేదు. ప్రజల సంక్షేమం, రైతుల అభ్యున్నతి కోసం కృషి చేయడమే నా ధ్యేయంగా పెట్టుకున్నాను.
గత నెలలో మల్యాల నుంచి నీటిని విడుదల చేసి రాయలసీమ జిల్లాలకు జలకళ తీసుకురావడం మా కృషికి నిదర్శనం. చరిత్ర సృష్టించే ఆ క్షణం రాయలసీమ ప్రజలకు మాత్రమే కాదు, మొత్తం రాష్ట్రానికే గర్వకారణం. ఈరోజు చిత్తూరు జిల్లాలోని చివరి భూములకూ నీరు అందడం నా కలను నెరవేర్చింది.
738 కిలోమీటర్ల దూరం నుంచి కృష్ణమ్మ కుప్పానికి రావడం అనేది అసాధారణమైన సాధన. ఈ ఘనతకు సాక్ష్యంగా ప్రజల ఆనందం, హర్షం చూసి హృదయం ఉప్పొంగిపోతుంది. పరమ సముద్రం సమీపంలో కృష్ణమ్మకు జలహారతి ఇవ్వడం ఈ విజయాన్ని మరింత ప్రత్యేకం చేసింది.
ఈ విజయంతో ప్రేరణ పొంది, శ్రీకాకుళం నుంచి చిత్తూరు వరకు ప్రతి సాగునీటి ప్రాజెక్టును పూర్తి చేయాలని సంకల్పించాను. ప్రతి ఎకరా పచ్చగా, సస్యశ్యామలంగా మారే వరకు కృషి చేస్తాను. ఈ రోజు సాధించిన విజయం, రాబోయే తరాలకు స్ఫూర్తిగా నిలుస్తుంది.
