టాలీవుడ్ చిత్ర పరిశ్రమలో ఇటీవల చోటు చేసుకున్న సినీ కార్మికుల బంద్పై చర్చించేందుకు ప్రముఖ నిర్మాతలు మెగాస్టార్ చిరంజీవిని కలిశారు. వేతనాల పెంపు, పని దినాలు, మరియు షూటింగ్లకు సంబంధించిన సమస్యలపై సినీ నిర్మాతలు ఒకటయ్యారు. ఈ సమస్యలు పరిశీలించి, పరిష్కార మార్గాల కోసం చర్చలు ప్రారంభించేందుకు చిరంజీవిని ముఖ్యంగా కలిశారు.
ఈ సమావేశంలో సురేష్ బాబు, అల్లు అరవింద్, మైత్రీ రవి, సుప్రియ, దామోదర్ ప్రసాద్ మరియు సి. కళ్యాణ్ లాంటి ప్రముఖులు పాల్గొన్నారు. వారు ప్రస్తుతం చిత్ర పరిశ్రమ ఎదుర్కొంటున్న సమస్యలను చిరంజీవికి వివరించారు. వేతనాల పెంపు విషయంలో యాక్టివ్ ప్రొడ్యూసర్స్ గిల్డ్ తీసుకున్న నిర్ణయాలపై కూడా చర్చ జరిగింది.
సి. కళ్యాణ్ మాట్లాడుతూ, “చిరంజీవిగారిని కలిశాం. ఆయన షూటింగ్స్ ఆగడం బాధాకరమని అన్నారు. రెండు వర్గాల వాదనలు విని, సర్దుబాటు చేయాలని సూచించారు. సమస్యను పరిష్కరించడానికి సమయం ఇస్తున్నాం, ఆ తరువాత అవసరమైతే తానే జోక్యం చేసుకుంటానన్నారు” అని తెలిపారు.
ఈ నేపథ్యంలో సినీ దర్శకుడు తమ్మారెడ్డి భరద్వాజ కూడా స్పందించారు. “నిర్మాత లేకుంటే సినిమా ఉండదు. అలాగే కార్మికులు లేకపోతే సినిమా పూర్తవదు. ఈ సమస్యలు సినిమాలలో తరచూ ఎదురవుతూనే ఉంటాయి. కొన్ని రోజులు గడిస్తే మళ్లీ పరిష్కార మార్గం కనపడుతుంది” అని అన్నారు.
అంతేకాదు, పరిశ్రమలో స్కిల్ డెవలప్మెంట్ అవసరం ఉందని, దానికి ఫెడరేషన్ పర్యవేక్షణలో సదుపాయాలు కల్పిస్తే మంచిదని అభిప్రాయపడ్డారు. ఇటువంటి సమస్యలకు శాశ్వత పరిష్కారాన్ని కనుగొనాలనే దిశగా చిరంజీవి తీసుకున్న ముందడుగు పరిశ్రమకు ఎంతో ఉపయోగకరంగా మారనుంది.
