పందొమ్మిదేళ్ల దివ్యా దేశ్ముఖ్ ఫిడే మహిళల చెస్ ప్రపంచకప్లో విజేతగా అవతరించింది. ఈ విజయం ద్వారా ఆమె భారత మహిళా చదరంగ చరిత్రలో కొత్త అధ్యాయాన్ని లిఖించింది. ఫైనల్లో తెలుగమ్మాయి కోనేరు హంపిపై విజయంతో దివ్య చిరుప్రాయంలోనే ప్రపంచకప్ గెలిచిన తొలి భారతీయురాలిగా నిలిచింది. రెండు భారతీయులు ఫైనల్లో తలపడటం ఇదే మొదటిసారి. ఇది భారత మహిళల చదరంగ అభివృద్ధికి ప్రతీకగా మారింది.
నాగ్పూర్కి చెందిన దివ్య విద్యావంతుల కుటుంబంలో జన్మించింది. చిన్నతనం నుంచే చదరంగంపై ఆసక్తిని కనబరిచి, అనేక జాతీయ, అంతర్జాతీయ పోటీల్లో ప్రతిభను చాటింది. అండర్-7, అండర్-9, అండర్-10 విభాగాల్లో వరుసగా టైటిళ్లు గెలిచింది. పన్నెండేళ్లకే ఇంటర్నేషనల్ మాస్టర్ హోదా సంపాదించింది. ప్రపంచ యూత్, ఆసియా, జూనియర్ చదరంగ ఛాంపియన్షిప్లలో విజయాలు సాధించి తన మేధస్సు చాటింది.
ఇప్పటివరకు సీనియర్ స్థాయిలో ఎక్కువ అనుభవం లేకున్నా, ప్రపంచకప్లో దివ్య దూకుడుగా ఆడింది. హారికను క్వార్టర్స్లో, టాన్ జోంగ్యీని సెమీఫైనల్లో ఓడించి తన ఆటకు పునాదులు వేసింది. తుది పోరులో హంపిపై గెలిచి ప్రపంచకప్ ట్రోఫీని గెలుచుకుంది. ఈ విజయంతో ఆమె గ్రాండ్మాస్టర్ హోదా కూడా దక్కించుకుంది. ఇది ఆమెకు గర్వకారణం మాత్రమే కాకుండా దేశానికి కూడా గౌరవంగా నిలిచింది.
దివ్య ఆటలోనూ, జీవితంలోనూ ప్రత్యేకతను చూపింది. తన ఫ్యాషన్, వ్యక్తిత్వం పై విమర్శలు ఎదురైనా, ఆమె వాటిని పట్టించుకోలేదు. “అమ్మాయిల ఆటతీరును చూడండి, వారి దుస్తులపై కాదు” అని చెప్పి విమర్శకులకు కాస్త గట్టి సమాధానం ఇచ్చింది. ఆటపట్ల ఉన్న అభిమానం, ఆత్మవిశ్వాసంతో తానే ఓ రోల్ మోడల్గా మారింది.
విశ్వనాథన్ ఆనంద్ ప్రారంభించిన భారత చెస్ విజయయాత్రను ఇప్పుడు యువత కొనసాగిస్తోంది. దివ్య విజయం భారత చదరంగానికి మారుమూలల్లోనూ నూతన స్పూర్తినిస్తుంది. ప్రస్తుతం భారత్లో 88మంది గ్రాండ్మాస్టర్లు ఉండటం, ప్రపంచ మహిళా చెస్లో భారత జట్లు ఓ వెలుగు వెలగడమూ చెస్లో మన ఆధిపత్యాన్ని చాటుతున్నాయి. దివ్య విజయంతో ఆ ప్రభావం మరింత విస్తరించనుంది.
