ఎన్డీఏ కూటమి సర్కార్ నిరుద్యోగుల కోసం 20 లక్షల ఉద్యోగాల కల్పన దిశగా వేగంగా చర్యలు చేపట్టింది. గుంటూరు జిల్లాలో నిర్వహించిన మెగా జాబ్ మేళాలో పాల్గొన్న ఎమ్మెల్యే గళ్ళా మాధవి ఈ విషయాన్ని వెల్లడించారు. రాష్ట్రవ్యాప్తంగా నిరుద్యోగ యువతకు ఉపాధి అవకాశాలు కల్పించేందుకు నాలుగు స్కిల్ డెవలప్మెంట్ సెంటర్లు ప్రారంభించామని ఆమె తెలిపారు. జాబ్ మేళాలో దాదాపు 26 కంపెనీలు పాల్గొన్నట్లు ఆమె చెప్పారు.
ఈ కార్యక్రమంలో మెప్మా పీడి దుర్గా భాయ్, మాస్టర్ మైండ్స్ అధినేత మట్టుపల్లి మోహన్ తదితరులు పాల్గొన్నారు. గుంటూరు జిల్లాలో నిర్వహించిన జాబ్ మేళాకు 1400 మందికిపైగా నిరుద్యోగులు హాజరయ్యారు. యువత ఈ అవకాశాన్ని పూర్తిగా వినియోగించుకోవాలని ఎమ్మెల్యే గల్లా మాధవి సూచించారు. ఆమె మాట్లాడుతూ, “కంపెనీలు చెప్పిన జాబ్ ప్యాకేజీ ప్రకారం నియామకం జరగాలని, ప్యాకేజీల్లో వేరొకదాన్ని చెప్పి మరోదాన్ని ఇవ్వడం తగదు” అని హెచ్చరించారు.
ఇదే సమయంలో, రాష్ట్రంలోని ఎస్సీ, ఎస్టీ నిరుద్యోగులకు ఉచిత శిక్షణ కల్పించేందుకు ప్రభుత్వం కూడా పలు చర్యలు తీసుకుంటోంది. సాంఘిక సంక్షేమశాఖ మంత్రి డోలా శ్రీబాలవీరాంజనేయస్వామి ప్రకటించిన ప్రకారం, అంబేడ్కర్ స్టడీ సర్కిళ్ల ద్వారా బ్యాంక్, SSC, RRB పోటీ పరీక్షల కోసం శిక్షణ అందించనున్నారు.
ఈ శిక్షణ విజయవాడ, విశాఖపట్నం, తిరుపతి వంటి ముఖ్య కేంద్రాల్లో ఇవ్వనున్నట్లు మంత్రి పేర్కొన్నారు. త్వరలోనే అభ్యర్థుల నుంచి దరఖాస్తుల స్వీకరణ ప్రారంభమవుతుందని తెలిపారు. ఉచిత శిక్షణతో పాటు, మార్గదర్శకాలు, చదవడానికి అవసరమైన విద్యాసామగ్రి కూడా అందిస్తామని చెప్పారు.
ఈ విధంగా, రాష్ట్ర ప్రభుత్వం మరియు ఎన్డీఏ కూటమి కలిసి నిరుద్యోగ యువతకు శ్రేయస్కర భవిష్యత్తు అందించేందుకు నడుం బిగించాయి. అవకాశాలను అందిపుచ్చుకునేందుకు యువత ముందుకు రావాలని, ఇలా చేపడుతున్న కార్యక్రమాల ద్వారా అభివృద్ధి దిశగా నిరుద్యోగులకు మార్గం సుగమం అవుతుందని నాయకులు అభిప్రాయపడుతున్నారు.
