ఆంధ్రప్రదేశ్‌ ముఖ్యమంత్రి చంద్రబాబు నాయుడు గ్రీన్ హైడ్రోజన్ వ్యాలీ అమరావతి డిక్లరేషన్‌ను అధికారికంగా విడుదల చేశారు. ఈ డిక్లరేషన్ ద్వారా 2030 నాటికి రాష్ట్రాన్ని గ్రీన్ ఎనర్జీ కారిడార్‌గా అభివృద్ధి చేయాలన్న దృఢ సంకల్పాన్ని ఆయన ప్రకటించారు. పర్యావరణ హితంగా, ఉత్పాదకతకు కేంద్రబిందువుగా ఉండే గ్రీన్ హైడ్రోజన్ ఉత్పత్తిలో ఆంధ్రప్రదేశ్‌ దేశానికి మార్గనిర్దేశకంగా మారాలని ప్రభుత్వ దృష్టి పెట్టింది.
ఈ డిక్లరేషన్ ద్వారా భారత్‌లో స్వచ్ఛ ఇంధనాల వినియోగాన్ని పెంపొందించడమే కాకుండా, గ్రీన్ హైడ్రోజన్ మాన్యుఫ్యాక్చరింగ్‌ కోసం సరైన విధానాలు రూపొందించనున్నారు. రాష్ట్రంలో ఉన్న ప్రకృతి వనరులను, ఖాళీ భూములను ఉపయోగించి గ్రీన్ హైడ్రోజన్ ఉత్పత్తికి అనుకూల వాతావరణం సృష్టించనున్నారు. దేశంలోనే అతిపెద్ద ఎకోసిస్టమ్‌ను ఏర్పాటు చేయడమే ఈ డిక్లరేషన్ ముఖ్య ఉద్దేశ్యం.
2027 నాటికి 2 గిగావాట్లు, 2029 నాటికి 5 గిగావాట్ల ఎలక్ట్రోలైజర్ల తయారీ లక్ష్యంగా నిర్ణయించారు. అలాగే 2029 నాటికి ప్రతి ఏడాది 1.5 మిలియన్ మెట్రిక్ టన్నుల గ్రీన్ హైడ్రోజన్ ఉత్పత్తి చేయాలని, కిలో గ్యాస్ ధరను రూ. 460 నుండి రూ. 160కి తగ్గించాలని కార్యాచరణ ప్రణాళిక సిద్ధమైంది. రెన్యువబుల్ ఎనర్జీ పంపిణీకి 25 గిగావాట్ల ఇన్ఫ్రాస్ట్రక్చర్ ఏర్పాటుకు ప్రణాళికలు చేపట్టారు.
ఈ రంగంలో పరిశోధనలకు రూ. 500 కోట్లు వెచ్చించి, 50 స్టార్టప్‌లకు ప్రోత్సాహకాలు కల్పించనున్నారు. పరిశోధన, అభివృద్ధి, ఉపాధి కల్పనకు తోడ్పడే విధంగా పాలసీలు రూపొందించనున్నారు. ఇది స్థానిక యువతకు అవకాశాలను సృష్టించే దిశగా మరొక అడుగు.
ఈ డిక్లరేషన్ ద్వారా ఆంధ్రప్రదేశ్‌ గ్లోబల్ గ్రీన్ ఎనర్జీ మ్యాప్‌లో నిలిచేలా మారనుంది. పరిశ్రమలు, శాస్త్రవేత్తలు, పర్యావరణవేత్తలు ఈ చర్యను అభినందిస్తున్నారు. దేశానికే మార్గదర్శకంగా నిలిచే ఈ డిక్లరేషన్ రాష్ట్ర అభివృద్ధికి బలమైన పునాది వేస్తుందని విశ్లేషకులు చెబుతున్నారు.
