ఏపీ బడ్జెట్ 2025-26: రాష్ట్ర పునర్నిర్మాణానికి బలమైన పునాది
ఆంధ్రప్రదేశ్ బడ్జెట్ 2025-26 రాష్ట్ర పునర్నిర్మాణానికి ఒక బలమైన పునాదిగా నిలవనుందని ముఖ్యమంత్రి చంద్రబాబు నాయుడు ప్రకటించారు. స్వర్ణాంధ్ర-2047 లక్ష్య సాధనకు ఈ బడ్జెట్ ఒక రోడ్‌మ్యాప్‌గా మారుతుందని తెలిపారు. బీసీ సంక్షేమానికి రూ.47,456 కోట్లు కేటాయించడంతో పాటు మే నెల నుంచి అమలు కానున్న సూపర్ సిక్స్ పథకాల కోసం భారీ నిధులు మంజూరు చేసినట్లు వివరించారు. రాష్ట్ర ఆర్థిక ప్రగతిని వేగవంతం చేసేందుకు ఈ బడ్జెట్ కీలక భూమిక పోషిస్తుందని ఆయన అన్నారు.
చివరి ఎనిమిది నెలల కాలంలో సంక్షేమ కార్యక్రమాలకు ప్రాధాన్యత ఇస్తూ పింఛన్ల పెంపు, అన్న క్యాంటీన్ల పునఃప్రారంభం, దీపం వంటి పథకాలను అమలు చేశామని సీఎం తెలిపారు. గత ప్రభుత్వంలో దెబ్బతిన్న ప్రతిక్షణం, ప్రతి వ్యవస్థ పునరుద్ధరణ చేసేందుకు కృషి చేస్తున్నామని స్పష్టం చేశారు. ఆర్థికంగా రాష్ట్రం ఎదుర్కొంటున్న సవాళ్లు ఉన్నప్పటికీ, ప్రజా సంక్షేమాన్ని దృష్టిలో ఉంచుకుని వ్యయాన్ని సమర్థవంతంగా వినియోగిస్తున్నామని పేర్కొన్నారు.
ఆర్థిక మంత్రి పయ్యావుల కేశవ్ మాట్లాడుతూ అమరావతి నిర్మాణాన్ని ప్రభుత్వం అత్యంత ప్రాధాన్యంగా తీసుకుంటోందని, ఇప్పటికే 93 కేంద్ర ప్రాయోజిత పథకాలలో 74 పథకాలను తిరిగి ప్రారంభించామని తెలిపారు. బడ్జెట్ కేవలం నిధుల కేటాయింపు మాత్రమే కాకుండా, రాష్ట్ర ప్రగతికి అవసరమైన అభివృద్ధి ప్రణాళికలతో రూపొందించామని వివరించారు. కౌలు రైతులకు న్యాయం చేసేందుకు కౌలు చట్టం అమలుకు ప్రభుత్వం సిద్ధమవుతోంది.
అన్నదాత సుఖీభవ, తల్లికి వందనం, ఆదరణ-3 వంటి కీలక సంక్షేమ పథకాల అమలుకు బడ్జెట్‌లో భారీగా నిధులు కేటాయించామన్నారు. బీసీ వర్గాల గృహ నిర్మాణానికి అదనంగా రూ.50,000 సహాయం అందించనున్నట్లు ప్రకటించారు. వేట నిషేధ సమయంలో మత్స్యకారులకు రూ.20,000 ఆర్థిక సహాయం అందించనున్నారు. వ్యవసాయ అభివృద్ధి కోసం రూ.48,341 కోట్లు కేటాయించామని, విద్య, ఎస్సీ, ఎస్టీ, మైనారిటీల సంక్షేమానికి పెద్దపీట వేశామని తెలిపారు.
స్వర్ణాంధ్ర – 2047 లక్ష్యాన్ని సాధించేందుకు 2025-26 బడ్జెట్ మార్గనిర్దేశం చేస్తుందని చంద్రబాబు తెలిపారు. పోలవరం, జల్ జీవన్ మిషన్, స్వచ్ఛాంధ్ర వంటి కీలక ప్రాజెక్టులకు సమర్థవంతంగా నిధులు కేటాయించినట్లు వివరించారు. ప్రజల అవసరాలు, అభివృద్ధి లక్ష్యాలను నెరవేర్చేలా ఈ బడ్జెట్ రూపొందించామని సీఎం చంద్రబాబు అన్నారు. ఈ పూర్తిస్థాయి బడ్జెట్ తమ ప్రభుత్వ విధానాలకు గట్టి మద్దతునిస్తుందని విశ్వాసం వ్యక్తం చేశారు.
