పార్వతీపురం మన్యం జిల్లా పాలకొండ నియోజకవర్గంలోని భామిని ఏపీ మోడల్ స్కూల్లో నిర్వహించిన మెగా పేరెంట్స్–టీచర్స్ మీటింగ్ (పీటీఎం 3.0) ఒక విశేషమైన కార్యక్రమంగా నిలిచింది. ఈ సమావేశంలో రాష్ట్ర ముఖ్యమంత్రి చంద్రబాబు నాయుడు గారితో కలిసి పాల్గొనడం ఒక గొప్ప అవకాశంగా భావించాం. తల్లిదండ్రులు, ఉపాధ్యాయులు, ప్రజా ప్రతినిధులు పెద్ద సంఖ్యలో హాజరై విద్యా రంగంపై తమ అభిప్రాయాలను పంచుకున్నారు. విద్యా ప్రమాణాలను పెంపొందించేందుకు ప్రభుత్వం తీసుకుంటున్న చర్యలు ప్రజల్లో మంచి విశ్వాసాన్ని కలిగిస్తున్నాయి.
ప్రభుత్వ పాఠశాలల విషయానికి వస్తే కొంతమంది ఇంకా చిన్న చూపుతో చూడటం బాధాకరం. ఈ దృక్పథాన్ని మార్చడానికి సమాజం మొత్తం కలిసి పని చేయాల్సిన అవసరం ఉంది. ప్రభుత్వ పాఠశాలలు కూడా ప్రైవేటు పాఠశాలలకు ఏమాత్రం తగ్గకుండా నాణ్యమైన విద్యను అందించగల సామర్థ్యం కలిగి ఉన్నాయి. అందుకు అవసరమైన మౌలిక వసతులు, బోధన పద్ధతులు, ఉపాధ్యాయుల శిక్షణ వంటి అంశాల్లో ప్రభుత్వం వేగంగా మార్పులు తెస్తోంది.
2029 నాటికి ఆంధ్రప్రదేశ్ను విద్యా రంగంలో నంబర్ వన్ రాష్ట్రంగా తీర్చిదిద్దాలనే లక్ష్యాన్ని ముఖ్యమంత్రి గారు స్పష్టంగా ప్రకటించారు. ఈ లక్ష్యం సాధించేందుకు పాఠశాలల అభివృద్ధి, విద్యార్థుల నైపుణ్యాలు, ఉపాధ్యాయుల సామర్ధ్యాలు అన్నీ సమన్వయంతో నడవాలి. టెక్నాలజీ ఆధారిత విద్యను ప్రోత్సహించడం ద్వారా విద్యార్థులు భవిష్యత్తు సవాళ్లను ధైర్యంగా ఎదుర్కొనే వరకూ సిద్ధం చేయడం ప్రభుత్వ ప్రధాన ధ్యేయం.
ముఖ్యంగా, కొత్త తరహా డిజిటల్ లెర్నింగ్ టూల్స్, స్మార్ట్ క్లాసులు, వర్చువల్ ల్యాబ్స్ వంటి సౌకర్యాలను పాఠశాలల్లో అందుబాటులోకి తేనున్నామని సీఎం గారు తెలిపారు. ఈ మార్పులు విద్యార్థుల నేర్చుకునే విధానాన్ని మరింత సులభతరం చేయడమే కాదు, వారికి విస్తృత దృష్టిని కూడా అందిస్తాయి. తల్లిదండ్రుల్లో పెరుగుతున్న అవగాహన కూడా ఈ మార్పులకు తోడ్పడుతోంది.
మూడు సంవత్సరాలలోనే ఏపీ మోడల్ ఆఫ్ ఎడ్యుకేషన్ను పూర్తిగా అమలు చేయాలనే సీఎం గారి ఆదేశాలు రాష్ట్ర విద్యా వ్యవస్థలో ఒక విప్లవాత్మక మార్పుకు నాంది పలుకుతున్నాయి. ఆయన ఆదేశాలను శ్రద్ధగా మరియు సమర్థంగా అమలు చేసేందుకు మేము కట్టుబడి ఉన్నాం. విద్యను ప్రాధాన్యంగా తీసుకునే ప్రభుత్వం ఉండగా, రాష్ట్ర భవిష్యత్తు మరింత వెలుగొందుతుందనే నమ్మకం ప్రజల్లో పెరుగుతోంది.
