‘కార్తికేయ 2’ చిత్రంతో జాతీయ స్థాయిలో ప్రత్యేక గుర్తింపు తెచ్చుకున్న దర్శకుడు చందూ మొండేటి, సితార ఎంటర్టైన్మెంట్స్ మరియు శ్రీకర్ ప్రొడక్షన్స్‌తో కలిసి ఒక అద్భుతమైన త్రీడీ యానిమేషన్ ప్రాజెక్ట్‌ను ప్రారంభించారు. ఈ మేగా ప్రాజెక్ట్‌కు “వాయుపుత్ర” అనే శక్తివంతమైన పేరు పెట్టారు. సూర్యదేవర నాగవంశీ, సాయి సౌజన్య, శ్రీకర్ ప్రొడక్షన్స్ సంయుక్తంగా నిర్మిస్తున్న ఈ సినిమా, వచ్చే ఏడాది దసరా కానుకగా ఐదు భారతీయ భాషల్లో విడుదల కాబోతోంది.
ఈ చిత్రం, యానిమేషన్ ప్రపంచంలో ఒక మైలురాయిగా నిలుస్తుందనే అంచనాలు ఉన్నాయి. మహావతార్ నరసింహా చిత్రంతో భారతీయ యానిమేషన్‌కు కొత్త దిశ చూపించిన తరువాత, “వాయుపుత్ర” అత్యాధునిక సాంకేతికతతో, అత్యున్నత ప్రమాణాలతో తెరకెక్కుతోంది. హనుమంతుడి వీరగాథను, ఆయన అచంచల భక్తిని, యుగాలతరబడి ప్రేరణనిచ్చిన చరిత్రను, ఈ సినిమా ఒక శక్తివంతమైన విజువల్ విందుగా ప్రేక్షకుల ముందుకు తీసుకురానుంది.
నిర్మాత సూర్యదేవర నాగవంశీ మాట్లాడుతూ, “సప్త చిరంజీవులలో ఒకరైన వాయుపుత్రుడు హనుమంతుడు, మన ఇతిహాసాలలో శాశ్వత శక్తి, భక్తి ప్రతీకగా నిలిచారు. ఆయన బలం, భక్తి, ధైర్యం – ఇవన్నీ తరతరాలను ప్రభావితం చేశాయి. ఆ మహోన్నత కథను అత్యున్నత స్థాయి విజువల్స్‌తో, భావోద్వేగాలతో మేళవించి మేము తెరపైకి తీసుకొస్తున్నాం” అన్నారు.
ఇటీవల విడుదల చేసిన ఫస్ట్ లుక్ పోస్టర్ ప్రేక్షకులను విశేషంగా ఆకట్టుకుంది. లంక దహనం దృశ్యంతో హనుమంతుడు కొండపై నిలబడి కనిపించే శక్తివంతమైన పోస్టర్, ఈ చిత్రానికి అద్భుతమైన విజువల్ ట్రీట్‌గా నిలుస్తోంది. దీని ద్వారా సినిమా స్థాయి, నిర్మాణ విలువలు, సాంకేతిక ప్రతిభ ముందే స్పష్టమవుతున్నాయి.
“వాయుపుత్ర కేవలం సినిమా కాదు, ఇది ఒక పవిత్ర దృశ్యం. థియేటర్లను దేవాలయాల్లా మార్చి, ప్రేక్షకులను భక్తి పారవశ్యంలో ముంచేయగల అద్భుత అనుభవాన్ని అందించబోతున్నాం” అని నాగవంశీ తెలిపారు. హనుమంతుని వీరగాథను అత్యున్నత స్థాయి సాంకేతికతతో మిళితం చేసిన ఈ త్రీడీ యానిమేషన్ చిత్రం, దసరా సీజన్‌లో భక్తి, వినోదం, విజువల్ వండర్‌లతో ప్రేక్షకులను అలరించనుంది.
