కొరియోగ్రాఫర్, హీరో, దర్శకుడు, నిర్మాతగా రాఘవ లారెన్స్ ఒక స్పూర్తిదాయకమైన పేరు. ఆయన చిత్రజీవితం కేవలం సినిమాలకే పరిమితం కాకుండా, మానవతా కార్యక్రమాల్లోనూ చక్కటి పాత్ర పోషించింది. హిట్-ఫ్లాప్లతో సంబంధం లేకుండా వరుసగా సినిమాలు చేస్తూ ప్రేక్షకులను అలరించడమే కాకుండా, తన ఆదాయాన్ని పేదల కోసం ఖర్చు చేస్తూ అందరికీ ఆదర్శంగా నిలిచారు.
లారెన్స్ వ్యక్తిత్వం ఆయన సహాయ కార్యక్రమాల ద్వారా మెరుస్తుంది. వృద్ధులు, అనాథలు, పేద విద్యార్థులకు ఆశ్రయంగా నిలుస్తూ ఎన్నో ఆశ్రమాలను నడిపిస్తున్నారు. ఆయనే స్వయంగా నడుపుతున్న ఆశ్రమాల్లో అనాథ పిల్లలకు ఆహారం, విద్య, జీవనోపాధి వంటి అంశాలలో సాయం అందిస్తున్నారు. ఆయన దయదాక్షిణ్యానికి లక్షలాది మంది అభిమానులు ఉన్నారు. ఈ నేపథ్యంలో ఆయన ఇటీవల చేసిన ఓ ఎమోషనల్ పోస్ట్ ఇప్పుడు అందరినీ కదిలిస్తోంది.
రవి రాథోడ్ అనే ఓ చిన్నారిని లారెన్స్ మాస్ సినిమా సమయంలో దత్తత తీసుకున్నారు. ఆ సమయంలో రవి తల్లిదండ్రులు ఆత్మహత్య చేసుకోవడంతో ఆ చిన్నారి అనాథగా మారాడు. లారెన్స్ వెంటనే స్పందించి అతడిని తాను చూసుకుంటానని నిర్ణయించారు. స్కూల్లో జాయిన్ చేయడమే కాకుండా అన్ని అవసరాలకూ సాయం చేశారు. కానీ, ఆ పిల్లాడు స్కూల్కి వెళ్లకుండా తప్పించుకొని పోవడంతో అప్పటి నుంచి అతడిని వెతుకుతున్నారు.
తాజాగా, లారెన్స్ తన సోషల్ మీడియా వేదికగా రవి రాథోడ్ గురించి పోస్ట్ చేశారు. “నిన్ను కొట్టను.. వచ్చి నన్ను కలువు రా..” అంటూ ఎంతో ఎమోషనల్ మెసేజ్తో పంచుకున్న ఆయన ఆ పోస్ట్ నెటిజన్ల మనసులను కదిలించింది. తాను ఇప్పటికీ ఆ చిన్నారి కోసం ఎదురుచూస్తున్నానని, రవి తిరిగి తనను కలవాలని కోరుకుంటున్నట్టు చెప్పారు.
ఈ సంఘటన లారెన్స్ హృదయం ఎంత విస్తృతమైందో, ఆయన మానవతా దృక్పథం ఎంత గొప్పదో చెప్పకనే చెబుతోంది. రాఘవ లారెన్స్ నిజంగా reel హీరో మాత్రమే కాదు, real hero కూడా అని మరోసారి నిరూపితమైంది.
