మలయాళ సినీ పరిశ్రమలో ప్రత్యేక స్థానం సంపాదించుకున్న హీరో ఫహాద్ ఫాసిల్ వరుస సినిమాలతో ప్రేక్షకులను అలరిస్తూనే ఉన్నాడు. విభిన్నమైన కథలను ఎంచుకోవడంలో ఆయన ఎప్పుడూ ముందుంటారు. ఆ క్రమంలో వచ్చిన చిత్రం మారీశన్. ఈ సినిమాకు సుదీశ్ శంకర్ దర్శకత్వం వహించగా, స్టార్ కమెడియన్ వడివేలు కీలక పాత్రలో నటించారు. కామెడీ థ్రిల్లర్గా తెరకెక్కిన ఈ సినిమా జూలై 25న థియేటర్లలో విడుదలై మంచి పాజిటివ్ టాక్ తెచ్చుకుంది.
ఈ సినిమా థియేటర్లలో రిలీజ్ అయిన నెల రోజులు పూర్తికాకముందే ఓటీటీ డేట్ని ఖరారు చేసుకుంది. నెట్ఫ్లిక్స్ మారీశన్ డిజిటల్ హక్కులను సొంతం చేసుకుంది. ఆగస్టు 22 నుంచి ఈ సినిమా నెట్ఫ్లిక్స్లో స్ట్రీమింగ్ కానుంది. ఫహాద్ సినిమాలు థియేటర్లలో తెలుగులో రిలీజ్ కాకపోయినా, ఓటీటీలో మాత్రం అన్ని భాషల్లో డబ్బింగ్ అవుతూ వస్తాయి. మారీశన్ కూడా తెలుగు సహా పలు భాషల్లో స్ట్రీమింగ్కి సిద్ధమవుతుంది.
కథ విషయానికొస్తే… దయాలన్ (ఫహాద్ ఫాసిల్) ఒక చిన్న దొంగ. అతడు చిన్న చిన్న దొంగతనాలతో జీవనం కొనసాగిస్తుంటాడు. ఒక రోజు అతనికి వేలాయుధం (వడివేలు) దగ్గర పెద్దమొత్తంలో డబ్బు ఉందని తెలిసిపోతుంది. ఆ డబ్బును ఎలాగైనా దోచుకోవాలని ప్లాన్ చేస్తాడు. కానీ వేలాయుధానికి అల్జీమర్స్ వ్యాధి ఉండడం వల్ల ప్రతిదీ మర్చిపోతూ ఉంటాడు.
ఒక సందర్భంలో ఫ్రెండ్ని కలవడానికి వెళ్లే వేలాయుధాన్ని మాయమాటలు చెప్పి దయాలన్ తన బండిపై తీసుకెళ్తాడు. ఆ ప్రయాణంలో వారి మధ్య జరిగే సంఘటనలు, ఎదురైన ఇబ్బందులు, దయాలన్ అనుకున్నది సాధించాడా లేదా అనే అంశాలు ఆసక్తికరంగా నడుస్తాయి. వడివేలు కామెడీతో పాటు భావోద్వేగాలను రేకెత్తించే సన్నివేశాలు సినిమాలో ప్రాధాన్యంగా నిలుస్తాయి.
థియేటర్లలో ఆశించినంతగా రాణించని మారీశన్ ఇప్పుడు ఓటీటీలో కొత్త అవకాశాన్ని ఎదుర్కోబోతోంది. ఫహాద్-వడివేలు కాంబినేషన్ ఇప్పటికే మామన్నన్ సినిమాలో ఆకట్టుకున్న నేపథ్యంలో, ఈసారి ప్రేక్షకులు ఏ విధంగా స్పందిస్తారనేది చూడాలి. నెట్ఫ్లిక్స్లో అందుబాటులోకి రానున్న ఈ చిత్రం విభిన్నమైన కథా సరళితో ఓటీటీ ప్రేక్షకులను ఎంతవరకు ఆకట్టుకుంటుందో ఆసక్తిగా మారింది.
