చైనాలోని క్వింగ్డావో వేదికగా జరుగుతున్న బ్యాడ్మింటన్ ఆసియా టీమ్ ఛాంపియన్షిప్ 2026లో భారత మహిళల జట్టు అద్భుతమైన ఆరంభాన్ని పొందింది. బుధవారం జరిగిన గ్రూప్ ‘Y’ తొలి పోరులో డిఫెండింగ్ ఛాంపియన్గా బరిలోకి దిగిన భారత్, మయన్మార్ను 5-0 తేడాతో క్లీన్ స్వీప్ చేసింది. స్టార్ ప్లేయర్ పి.వి. సింధు గైర్హాజరీలోనూ కుర్రాళ్లు సత్తా చాటడం విశేషం.
తొలి సింగిల్స్లో 17 ఏళ్ల వర్ధమాన క్రీడాకారిణి తన్వీ శర్మ అద్భుత ప్రదర్శన చేసింది. కేవలం 32 నిమిషాల్లోనే మయన్మార్ స్టార్ ప్లేయర్ తెట్ హ్తార్ తుజార్ను 21-13, 21-16తో ఓడించి భారత్కు శుభారంభం అందించింది. అనంతరం జరిగిన రెండో సింగిల్స్లో రక్షిత శ్రీ సంతోష్ రామ్రాజ్ 21-12, 21-6తో ఎయింట్ చిట్ ఫూపై ఘనవిజయం సాధించి, భారత ఆధిక్యాన్ని 2-0కి పెంచింది.
మూడో సింగిల్స్లో మాళవిక బన్సోడ్ తన అనుభవాన్ని రంగరించి లిన్ లిన్ హ్తైట్ను 21-19, 21-12తో చిత్తు చేసింది. దీంతో ఐదు మ్యాచ్ల సిరీస్లో భారత్ 3-0తో తిరుగులేని విజయాన్ని ఖాయం చేసుకుంది. అయినప్పటికీ, డబుల్స్ మ్యాచ్లలోనూ భారత క్రీడాకారిణులు తమ జోరును కొనసాగించారు. మయన్మార్ ప్లేయర్లకు ఎక్కడా అవకాశం ఇవ్వకుండా పూర్తి ఆధిపత్యం ప్రదర్శించారు.
మహిళల డబుల్స్ విభాగంలో ప్రియ కొంజెంగ్బామ్ – శ్రుతి మిశ్రా జంట 21-15, 21-16తో సు లాట్ – తెట్ హ్తార్ తుజార్ జోడీని ఓడించింది. చివరి మ్యాచ్లో త్రిసా జాలీ – గాయత్రీ గోపీచంద్ ద్వయం కేవలం కొద్ది నిమిషాల్లోనే 21-8, 21-6తో ప్రత్యర్థిని మట్టికరిపించి 5-0 క్లీన్ స్వీప్ను పూర్తి చేశారు. ఈ విజయంతో భారత జట్టు టోర్నీలో తమ ఆత్మవిశ్వాసాన్ని రెట్టింపు చేసుకుంది.
గ్రూప్ దశలో భారత్ తన తదుపరి మ్యాచ్లో గురువారం బలమైన థాయ్లాండ్ జట్టుతో తలపడనుంది. గత ఎడిషన్లో రన్నరప్గా నిలిచిన థాయ్లాండ్తో పోరు భారత్కు అసలైన పరీక్షగా నిలవనుంది. మరోవైపు, భారత పురుషుల జట్టు కూడా తమ తొలి మ్యాచ్లో సింగపూర్ను ఎదుర్కోనుంది. యువ క్రీడాకారులు ఇలాగే రాణిస్తే, భారత్ మరోసారి ఆసియా ఛాంపియన్గా నిలిచే అవకాశం మెండుగా ఉంది.
