టాలీవుడ్ యంగ్ హీరో శర్వానంద్ చాలా కాలం తర్వాత బాక్సాఫీస్ వద్ద ఘన విజయం అందుకున్న విషయం తెలిసిందే. రామ్ అబ్బరాజు దర్శకత్వంలో తెరకెక్కిన ‘నారీ నారీ నడుమ మురారి’ చిత్రం ప్రేక్షకులను ఆకట్టుకొని సాలిడ్ హిట్గా నిలిచింది. శర్వానంద్ కెరీర్లో ఇది ప్రత్యేకమైన విజయంగా చెప్పుకోవచ్చు. వినోదం, భావోద్వేగాలు, కుటుంబ కథాంశాన్ని సమపాళ్లలో మేళవించిన ఈ సినిమా అన్ని వర్గాల ప్రేక్షకులను మెప్పించింది.
‘సామజవరగమన’ ఫేమ్ రామ్ అబ్బరాజు దర్శకత్వంలో ఈ సినిమాను అనిల్ సుంకర నిర్మించారు. శర్వానంద్కు జోడీగా సాక్షి వైద్య మరియు సంయుక్త హీరోయిన్లుగా నటించారు. వాస్తవానికి ఈ సినిమా సంక్రాంతికి విడుదలవుతుందని మొదట పెద్దగా అంచనాలు లేవు. కానీ నిర్మాతల వ్యూహాత్మక ప్లానింగ్తో జనవరి 14న థియేటర్లలోకి వచ్చిన ఈ చిత్రం అంచనాలను తలకిందులు చేస్తూ మంచి వసూళ్లు సాధించింది.
ఈ సినిమా ఇప్పుడు ఓటీటీ ప్రేక్షకుల ముందుకు రావడానికి సిద్ధమైంది. అమెజాన్ ప్రైమ్ వీడియోలో ఫిబ్రవరి 4 నుంచి స్ట్రీమింగ్ కానున్నట్లు అధికారికంగా ప్రకటించారు. తెలుగుతో పాటు కన్నడ, తమిళం, మలయాళం, హిందీ భాషల్లో కూడా ఈ సినిమా అందుబాటులోకి రానుంది. థియేటర్లలో మిస్ అయిన ప్రేక్షకులకు ఇది మంచి అవకాశం అని చెప్పాలి.
కథ విషయానికి వస్తే, ఓ కంపెనీలో ఆర్కిటెక్ట్గా పనిచేసే గౌతమ్ (శర్వానంద్) అదే కంపెనీలో సివిల్ ఇంజనీర్గా పనిచేసే నిత్య (సాక్షి వైద్య)తో ప్రేమలో పడతాడు. ఇద్దరూ పెళ్లికి సిద్ధమవుతుండగా, గౌతమ్ గత సంబంధం అడ్డంకిగా మారుతుంది. అతని పాస్ట్లోని దియా (సంయుక్త)తో బ్రేకప్ కారణాలు కథలో ఆసక్తికరంగా మలుపులు తిరుగుతాయి.
అలాగే గౌతమ్ తండ్రి కార్తీక్ (సీనియర్ నరేష్) లేటు వయసులో చేసిన పెళ్లి కూడా కథలో కీలకంగా మారుతుంది. చివరికి గౌతమ్–నిత్యల పెళ్లి జరుగుతుందా? దియా తిరిగి గౌతమ్ జీవితంలోకి ఎందుకు వస్తుంది? వంటి ప్రశ్నలకు సమాధానాలే ఈ సినిమా కథ. కుటుంబ భావోద్వేగాలతో కూడిన ఈ సినిమాను ఓటీటీలో తప్పకుండా చూడాల్సిందే.
