బ్రెజిల్ పర్యటనలో ఉన్న భారత ప్రధాన మంత్రి నరేంద్ర మోదీకి అరుదైన గౌరవం లభించింది. ఆయనకు బ్రెజిల్ ప్రభుత్వం అత్యున్నత పౌర పురస్కారమైన ‘గ్రాండ్ కాలర్ ఆఫ్ ది నేషనల్ ఆర్డర్ ఆఫ్ ది సదర్న్ క్రాస్’ను ప్రదానం చేసింది. ద్వైపాక్షిక సంబంధాల బలోపేతానికి, అంతర్జాతీయ వేదికలపై బ్రెజిల్తో ఉన్న స్నేహాన్ని మరింత ముడిపెట్టినందుకు గానూ బ్రెజిల్ అధ్యక్షుడు లులా ఈ పురస్కారాన్ని అందజేశారు. ఇది మోదీకి లభించిన 26వ అంతర్జాతీయ గౌరవం కావడం విశేషం.
ఈ పురస్కారం తనకు మాత్రమే కాకుండా 140 కోట్ల భారతీయుల ప్రతినిధిగా స్వీకరిస్తున్నానని మోదీ అన్నారు. ప్రపంచంలో భారత్ ప్రతిష్ట పెరుగుతున్నదానికి ఇది ఉదాహరణగా నిలుస్తుందన్నారు. ఇటీవలే ఆయన ట్రినిడాడ్ అండ్ టొబాగో పర్యటనలో “ది ఆర్డర్ ఆఫ్ ది రిపబ్లిక్ ఆఫ్ ట్రినిడాడ్ అండ్ టొబాగో” అనే దేశ అత్యున్నత పురస్కారాన్ని అందుకున్నారు. విదేశీ నేతల్లో ఈ గౌరవం అందుకున్న మొదటి నాయకుడిగా మోదీ నిలిచారు.
ఆ దేశ అధ్యక్షురాలు క్రిస్టిన్ కార్లా కంగా చేతుల మీదుగా ఆయన ఈ పురస్కారాన్ని అందుకున్నారు. ఈ గౌరవం ఇరుదేశాల మధ్య శాశ్వత స్నేహానికి ప్రతీక అని మోదీ అన్నారు. ట్రినిడాడ్లో స్థిరపడిన భారతీయ వంశావళులే ఈ బంధానికి చిహ్నమని చెప్పారు. భాగస్వామ్యాన్ని మరింత బలోపేతం చేసేందుకు కృషి చేస్తానని హామీ ఇచ్చారు.
ఇటీవలే మోదీ పశ్చిమ ఆఫ్రికాలోని ఘనా పర్యటనలో “ది ఆఫీసర్ ఆఫ్ ది ఆర్డర్ ఆఫ్ ది స్టార్ ఆఫ్ ఘనా” పురస్కారాన్ని అందుకున్నారు. ఘనా అధ్యక్షుడు జాన్ ద్రమానీ చేతుల మీదుగా ఆయనకు ఈ గౌరవం లభించింది. ఈ పురస్కారాలు భారత ప్రధాని అంతర్జాతీయంగా విశ్వసనీయత కలిగిన నాయకుడిగా ఎదిగినదాన్ని సూచిస్తున్నాయి.
ప్రస్తుతం మోదీ ఐదు దేశాల పర్యటనలో ఉన్నారు. ఈ పర్యటన జులై 2న ప్రారంభమై జులై 9వ తేదీ వరకు కొనసాగనుంది. ఇప్పటికే ఆయన ఘనా, ట్రినిడాడ్, అర్జెంటీనా, బ్రెజిల్ దేశాలను సందర్శించారు. తదుపరి ఆయన నమీబియా వెళ్లనున్నారు. గత మూడు దశాబ్దాల్లో నమీబియా పర్యటించే తొలి భారత ప్రధాని నరేంద్ర మోదీ కావడం గర్వకారణం.
