సంగారెడ్డి జిల్లాలో తీవ్ర విషాదం నింపిన భారీ అగ్నిప్రమాదం చోటు చేసుకుంది. ఈ ఘటన పటాన్చెరు మండలం పాశమైలారం పారిశ్రామికవాడలోని సీగాచి కెమికల్స్ పరిశ్రమలో జరిగింది. రియాక్టర్లో అనూహ్యంగా పేలుడు సంభవించడంతో ఒక్కసారిగా మంటలు ఎగసిపడ్డాయి. ఆ సమయంలో పరిశ్రమలో పని చేస్తున్న కార్మికులు మంటల్లో చిక్కుకున్నారు. సమాచారం అందుకున్న వెంటనే ఫైర్ సిబ్బంది ఘటనా స్థలానికి చేరుకుని మంటలను అదుపులోకి తీసుకురావడానికి చర్యలు ప్రారంభించారు.
ఈ ఘోర ప్రమాదంలో మొత్తం ఆరుగురు కార్మికులు ప్రాణాలు కోల్పోయారు. వీరిలో ఐదుగురు పేలుడు సమయంలోనే మృతిచెందగా, మరో కార్మికుడు ఆస్పత్రిలో చికిత్స పొందుతూ మరణించాడు. మిగతా కార్మికుల్లో కొంతమందికి తీవ్ర గాయాలయ్యాయి. వారి పరిస్థితి విషమంగా ఉన్నట్లు తెలుస్తోంది. పేలుడు ధాటికి పలువురు కార్మికులు 100 మీటర్ల దూరం వరకు ఎగిరిపడ్డారన్న సమాచారం స్థానికుల ద్వారా వెలుగుచూసింది.
పేలుడు తీవ్రతకు పరిశ్రమకు చెందిన షెడ్ పూర్తిగా కూలిపోయింది. పక్కనే ఉన్న మరో భవనానికి కూడా తీవ్రంగా బీటలు ఏర్పడ్డాయి. పరిశ్రమ మొత్తం పొగమంచులో మునిగిపోయింది. గాయపడిన కార్మికులను చందానగర్, ఇస్నాపూర్లోని ప్రైవేట్ ఆసుపత్రులకు తరలించి అత్యవసర చికిత్స అందిస్తున్నారు. తక్షణ సహాయ చర్యల కోసం రెస్క్యూ బృందాలు రంగంలోకి దిగాయి.
ఈ సంఘటనపై అధికార యంత్రాంగం అప్రమత్తమైంది. సంగారెడ్డి జిల్లా కలెక్టర్ ప్రావీణ్య, ఎస్పీ పరితోష్ ఘటనా స్థలానికి చేరుకొని పరిస్థితిని సమీక్షించారు. పరిశ్రమ యాజమాన్యం నిర్లక్ష్యమే ఈ ప్రమాదానికి కారణమా అనే కోణంలో అధికారులు విచారణ ప్రారంభించారు.
ఇతర పరిశ్రమల్లో ఇటువంటి ప్రమాదాలు పునరావృతం కాకుండా చర్యలు తీసుకోవాలని అధికారులు తెలిపారు.
