నటసింహం నందమూరి బాలకృష్ణ అన్విత గ్రూప్ బ్రాండ్ అంబాసిడర్గా కొనసాగనున్నారు. ఈ వార్తను అన్విత గ్రూప్ చైర్మన్ మరియు మేనేజింగ్ డైరెక్టర్ అచ్యుతరావు బొప్పన శుక్రవారం హైదరాబాద్లో జరిగిన ప్రత్యేక కార్యక్రమంలో ప్రకటించారు. ఈ సందర్భంగా అన్విత గ్రూప్ రూపొందించిన బ్రాండ్ ఫిల్మ్స్ను ఆయన ఆవిష్కరించారు. బాలకృష్ణ గారి సినీ ప్రయాణం, సేవా మనోభావం, విద్య మరియు ఆరోగ్య రంగాల్లో చేసిన సేవలు సమాజానికి ఒక ఆదర్శంగా నిలిచాయని అచ్యుతరావు బొప్పన అన్నారు.
బాలకృష్ణ వ్యక్తిత్వం, మాట తప్పని ధైర్యం మరియు ప్రజల హృదయాలను గెలుచుకునే విధానం అన్విత గ్రూప్ మౌలిక సిద్ధాంతాలకు బాగా సరిపోతుందని ఆయన చెప్పారు. అందుకే, నందమూరి బాలకృష్ణను బ్రాండ్ అంబాసిడర్గా తీసుకోవడం సంస్థకు గర్వకారణమని తెలిపారు. “Build Happiness” అనేది అన్విత గ్రూప్ నినాదం, అదే భావనను ప్రజల్లోకి తీసుకెళ్లగల ప్రతినిధిగా బాలకృష్ణ నిలుస్తారని అచ్యుతరావు బొప్పన పేర్కొన్నారు.
అన్విత గ్రూప్ గత రెండు దశాబ్దాలుగా దుబాయ్, అబూదాబిలో నివాస, వాణిజ్య, హాస్పిటాలిటీ రంగాల్లో 4 కోట్ల చదరపు అడుగుల నిర్మాణాన్ని పూర్తి చేసింది. ప్రస్తుతం అమెరికా డల్లాస్లో లైఫ్స్టైల్ కమ్యూనిటీని అభివృద్ధి చేస్తోంది. హైదరాబాద్లో మూడు ప్రధాన ప్రాజెక్టులు, మొత్తం 80 లక్షల చదరపు అడుగుల నిర్మాణం కొనసాగుతోంది. కొల్లూరులోని అన్విత ఇవానా ప్రాజెక్ట్కు షెడ్యూల్కు ముందే ఆక్యుపెన్సీ సర్టిఫికేట్ లభించడం విశేషమని తెలిపారు.
అలాగే, అన్విత హై నైన్, మేడ్చల్లోని అన్విత పార్క్సైడ్ ప్రాజెక్టులు నగర జీవనానికి కొత్త నిర్వచనం ఇవ్వనున్నాయి. భవిష్యత్ ప్రణాళికల్లో హైదరాబాద్ పరిసర ప్రాంతాలు, విజయవాడ, విశాఖలో ప్రపంచ స్థాయి ప్రాజెక్టులను చేపట్టనున్నట్లు అచ్యుతరావు బొప్పన వెల్లడించారు. విజయవాడలో బెంజ్ సర్కిల్ సమీపంలో ఎత్తైన భవనాలను నిర్మించనున్నట్టు చెప్పారు.
రాబోయే 5–6 సంవత్సరాల్లో ప్రతి ఏడాది సుమారు వెయ్యి యూనిట్లను వినియోగదారులకు అందించడమే లక్ష్యంగా అన్విత గ్రూప్ ముందుకు సాగుతుందని అన్నారు. ఈ కార్యక్రమంలో అన్విత గ్రూప్ డైరెక్టర్లు నాగభూషణం బొప్పన, శ్రీకాంత్ బొప్పన, విజయరాజు, హ్యాపీ హోమ్స్ డైరెక్టర్ మురళి తదితరులు పాల్గొన్నారు.
