తిరుమల శ్రీవాణి టికెట్లకు సంబంధించి తిరుమల తిరుపతి దేవస్థానం (టీటీడీ) ఇటీవల కీలక మార్పులు చేసింది. ఇప్పటివరకు టికెట్ కొనుగోలు చేసిన భక్తులకు మూడు రోజుల తర్వాత దర్శనానికి అనుమతి ఇవ్వబడుతోంది. అయితే కొత్త విధానంలో ఏ రోజున టికెట్ తీసుకున్నా, అదే రోజు దర్శనానికి అవకాశం కల్పించనున్నట్లు టీటీడీ వెల్లడించింది. భక్తులకు వసతి సమస్యలు లేకుండా ఉండేందుకు ఈ నిర్ణయం తీసుకున్నట్టు తెలిపింది.
తిరుమలలో వసతులు సమర్థవంతంగా అందించేందుకు టీటీడీ ఎన్నో చర్యలు తీసుకుంటోంది. ఇందులో భాగంగా శ్రీవాణి దర్శన విధానంలో మార్పులు చేయడం జరిగింది. తిరుమలలో భక్తుల రద్దీ పెరుగుతున్న నేపథ్యంలో, అదనపు వసతుల కోసం తగిన చర్యలు తీసుకుంటున్నట్టు అధికారులు చెప్పారు. ఈ మార్పుల వల్ల భక్తులకు తక్కువ సమయంతోనే స్వామివారి దర్శనం చేయడానికి అవకాశం ఉంటుంది.
ఇప్పటి వరకు ఉదయం 10 గంటలకు ప్రారంభమయ్యే శ్రీవాణి దర్శన సమయాన్ని సాయంత్రం 4.30కు మార్చారు. తిరుమల గోకులం గెస్ట్ హౌస్‌లో జరిగిన అధికారుల సమావేశంలో ఈవో వెంకయ్య చౌదరి ఈ నిర్ణయాన్ని ప్రకటించారు. ఆఫ్‌లైన్‌లో టికెట్ పొందిన భక్తులకు అదే రోజు దర్శనానికి అనుమతి ఇవ్వనున్నట్టు తెలిపారు. ఈ మార్పులు ఆగస్టు 1 నుంచి అమల్లోకి రానున్నాయి.
రేణిగుంట విమానాశ్రయంలో కూడా దర్శన టికెట్లు జారీ చేసే సమయాల్లో మార్పులు చేశారు. ఉదయం 7 గంటల నుంచి మధ్యాహ్నం 1 గంట వరకూ టికెట్లు అందించనున్నారు. తిరుమలలో ఆఫ్‌లైన్ ద్వారా రోజుకు 800 టికెట్లు, విమానాశ్రయంలో 200 టికెట్లు అందిస్తారు. అక్టోబర్ 31 వరకు ఇప్పటికే బుకింగ్ చేసుకున్న వారికి ఉదయం 10 గంటల సమయానికే దర్శనం ఉంటుంది. నవంబర్ 1 నుంచి అందరికీ కొత్త సమయానుసారమే అవకాశం కల్పించనున్నారు.
ఈ విధానంలో టీటీడీకి రోజూ రూ. కోటిన్నర ఆదాయం వస్తోంది. ఏటా ఇది రూ. 500 కోట్ల వరకు చేరుతోంది. శ్రీవాణి టికెట్ల ద్వారా వచ్చిన ఈ ఆదాయాన్ని ధార్మిక కార్యక్రమాలకే వినియోగిస్తున్నట్టు అధికారులు చెప్పారు. కొత్త విధానం వల్ల భక్తులకు వేచి ఉండే సమయం తగ్గిపోతుందని, దర్శనాలకు మరింత సౌలభ్యం కలుగుతుందని టీటీడీ ఆశిస్తోంది.
