జాగ్రెబ్ (క్రొయేషియా) వేదికగా జరుగుతున్న సూపర్ యునైటెడ్ ర్యాపిడ్, బ్లిట్జ్ టోర్నీలో భారత గ్రాండ్ మాస్టర్, వరల్డ్ చాంపియన్ డి. గుకేశ్ తన ప్రతిభతో మరోసారి ఆకట్టుకున్నాడు. ఈ టోర్నీలో గుకేశ్ ఇప్పటివరకు మూడు గేమ్లు ఆడి రెండు విజయాలు, ఒక పరాజయాన్ని తన ఖాతాలో వేసుకున్నాడు. ర్యాపిడ్ విభాగంలో డుడా జాన్ క్రిస్టోఫ్ (పోలెండ్)తో జరిగిన తొలి గేమ్లో గుకేశ్ ఓటమి పాలైనాడు.
అయితే తన తర్వాతి రెండు గేమ్లలో గుకేశ్ అసాధారణంగా రాణించాడు. ఫ్రాన్స్కు చెందిన అలిరెజా ఫిరౌజ, భారత మరో యువ గ్రాండ్ మాస్టర్ ఆర్. ప్రజ్ఞానందపై గెలుపొంది నాలుగు పాయింట్లతో డుడా, వెస్లీ సో, మాగ్నస్ కార్ల్సన్లతో కలిసి టాప్ ప్లేస్లో కొనసాగుతున్నాడు. ఈ టోర్నీలో గుకేశ్ ప్రదర్శనకు విశేష ప్రశంసలు లభిస్తున్నాయి.
మరోవైపు వరల్డ్ నంబర్ వన్ మాగ్నస్ కార్ల్సన్ తన ఆటతీరు కొనసాగించాడు. అమెరికాకు చెందిన వెస్లీ సోపై విజయం సాధించిన కార్ల్సన్, డుడా, ఇవాన్ సారిక్లతో గేమ్లను డ్రాగా ముగించాడు. వెస్లీ సో కూడా తన శైలిని కొనసాగిస్తూ కరువాన, అనిష్ గిరిలపై గెలిచాడు. ఇదే సమయంలో గుకేశ్ చేతిలో ఓటమిపాలైన ప్రజ్ఞానంద, ఫిరౌజ, నొడిర్బెక్ అబ్దుసత్తారోవ్లతో గేమ్లను డ్రాగా ముగించుకున్నాడు.
ఈ ఫలితాల నేపథ్యంలో ప్రజ్ఞానంద రెండు పాయింట్లతో పదో స్థానంలో ఉన్నాడు. టోర్నీలో ఇంకా ర్యాపిడ్ విభాగంలో ఆరు రౌండ్స్, బ్లిట్జ్ విభాగంలో 18 రౌండ్స్ మిగిలి ఉన్నాయి. ఈ క్రమంలో గుకేశ్ తదుపరి గేమ్లలో కూడా ఇదే గెలుపు మోమెంటాన్ని కొనసాగిస్తాడేమో చూడాలి.
సూపర్ గ్రాండ్ మాస్టర్ల మధ్య ఈ పోటీలు అభిమానులను ఉత్కంఠతో ఉంచుతున్నాయి. భారతీయులుగా గుకేశ్ విజయంతో గర్వపడాల్సిన సమయం ఇది.
