భారత వ్యోమగామి గ్రూప్ కెప్టెన్ శుభాంశు శుక్లా చరిత్రలో మరో గొప్ప అధ్యాయాన్ని రాశారు. యాక్సియం-4 మిషన్‌లో భాగంగా అంతరిక్షంలోకి వెళ్లిన ఆయన, దాదాపు 41 ఏళ్ల తర్వాత అంతరిక్షంలో అడుగుపెట్టిన తొలి భారతీయుడిగా నిలిచారు. ఆయనతో పాటు మిగతా ముగ్గురు అంతరిక్ష యాత్రికులు అంతర్జాతీయ అంతరిక్ష కేంద్రానికి ప్రయాణించారు. ఈ ఘనతపై దేశవ్యాప్తంగా హర్షాతిరేకాలు వ్యక్తమవుతున్నాయి.
శుభాంశు శుక్లా భారత వైమానిక దళానికి చెందిన అధికారి కావడం విశేషం. ఈ మిషన్‌ ద్వారా ఆయన ఇస్రో తరఫున అంతరిక్షంలో అడుగుపెట్టిన తొలి వ్యోమగామిగా రికార్డు సృష్టించారు. ఇది భారత్ అంతరిక్ష రంగానికి పెద్ద గుర్తింపు. అటు దేశంలోనే కాదు, ప్రపంచ వ్యాప్తంగా భారత ప్రతిభను చాటే ఘట్టంగా ఇది నిలిచింది.
ఈ సందర్భంగా ఐటీ శాఖ మంత్రి నారా లోకేష్ సోషల్ మీడియా వేదికగా స్పందించారు. శుభాంశు శుక్లా, అతని బృందానికి అభినందనలు తెలుపుతూ.. “ఇది చారిత్రాత్మక ప్రయాణం. శుభాంశు శుక్లా ధైర్యం, ముందుచూపు, అంకితభావం నూతన భారత ఆత్మకు ప్రతిరూపం. ఈ యాత్ర ప్రపంచ అంతరిక్ష రంగంలో భారత ప్రతిష్ఠను పెంచుతుంది” అంటూ లోకేష్ ట్వీట్ చేశారు.
అలాగే లోకేష్ ట్వీట్‌లో ఇస్రో, నాసా, స్పేస్ ఎక్స్, ఇండియన్ ఎయిర్ ఫోర్స్, యాక్సియం-4 బృందాలకు కృతజ్ఞతలు తెలిపారు. శుభాంశు ప్రయాణించిన అంతరిక్ష వాహనానికి సంబంధించిన ఫోటోను కూడా ఆయన షేర్ చేశారు. ఇది యువతలో శాస్త్రీయ ప్రేరణను కలిగించేదిగా అభిప్రాయపడ్డారు.
మొత్తానికి శుభాంశు శుక్లా ఘనత దేశానికి గర్వకారణంగా నిలిచింది. ఇది భవిష్యత్‌ తరాలకు స్ఫూర్తిదాయకంగా మారి, మరిన్ని అంతరిక్ష ప్రయాణాలను భారత్ తరఫున ప్రారంభించే దిశగా మార్గదర్శకంగా నిలుస్తుంది.
