ట్రంప్ వ్యాఖ్యలు అమెరికా నిధులపై భారత్‌లో పెరుగుతున్న రాజకీయ ఉత్కంఠ
అమెరికా అధ్యక్షుడు డొనాల్డ్ ట్రంప్ తాజాగా చేసిన సంచలన వ్యాఖ్యలు భారత రాజకీయాల్లో చర్చనీయాంశంగా మారాయి. ఆయన భారతదేశానికి అమెరికా యూఎస్‌ఎయిడ్‌ నిధుల ప్రవాహాన్ని ‘కిక్‌బ్యాక్ స్కీమ్’గా అభివర్ణించారు. ‘‘ఈ నిధులు భారత్‌కే పోతున్నాయా? వాటిని అందుకున్నవారు ఏం ఆలోచిస్తారో ఊహించగలరా?’’ అంటూ ట్రంప్ తీవ్ర విమర్శలు గుప్పించారు. నిధులు ఖర్చు పెట్టడం మాత్రమే కాదని, వాటిని పంపినవారికి తిరిగి ప్రయోజనం కలిగేలా పని చేస్తారని ఆయన అన్నారు. ఈ వ్యాఖ్యలు భారత రాజకీయ వర్గాల్లో కలకలం రేపాయి. బీజేపీ ఈ అంశాన్ని కాంగ్రెస్‌పై విమర్శించేందుకు ఉపయోగిస్తుండగా, కాంగ్రెస్ యూఎస్‌ఎయిడ్‌ నిధులపై స్పష్టత ఇవ్వాలని డిమాండ్ చేస్తోంది.
ట్రంప్ చేసిన వ్యాఖ్యల అనంతరం, భారత రాజకీయాల్లో ఈ అంశం వేడెక్కింది. బీజేపీ అధికార ప్రతినిధి గౌరవ్ భాటియా, కాంగ్రెస్ నేత రాహుల్ గాంధీపై తీవ్ర వ్యాఖ్యలు చేశారు. ఆయన రాహుల్‌ను దేశద్రోహిగా అభివర్ణిస్తూ, ‘‘యూపీఏ హయాంలో భారత్‌ భారీగా అమెరికా సహాయ నిధులు అందుకుంది. అయితే, 2014లో మోదీ ప్రభుత్వం అధికారంలోకి వచ్చిన తర్వాత ఈ నిధులు గణనీయంగా తగ్గాయి. గతంలో ఆ నిధులు ప్రభుత్వానికి కాకుండా ఎన్జీవోలకు వెళ్లాయని, అవి కాంగ్రెస్‌కు ప్రయోజనం కలిగించాయని’’ ఆరోపించారు. దీనికి ప్రతిస్పందనగా, కాంగ్రెస్ ప్రతినిధి పవన్ ఖేడా, ట్రంప్ చెబుతున్న నిధులు భారత్‌కు కాకుండా బంగ్లాదేశ్‌కు మళ్లించబడ్డాయని స్పష్టం చేశారు.
కేంద్ర ప్రభుత్వం ఈ వివాదంపై స్పందిస్తూ, భద్రతా సంస్థలు దర్యాప్తు ప్రారంభించాయని ప్రకటించింది. విదేశాంగ మంత్రిత్వ శాఖ ప్రతినిధి రణధీర్ జైశ్వాల్ మాట్లాడుతూ, ‘‘భారత అంతర్గత వ్యవహారాల్లో విదేశీ శక్తుల జోక్యం పెరుగుతోందన్న వార్తలు ఆందోళన కలిగిస్తున్నాయి. ఎన్నికల వ్యవస్థపై విదేశీ నిధుల ప్రభావం ఉందా అన్నదానిపై దృష్టి పెట్టాం. త్వరలోనే నిజాలు బయటకు వస్తాయి’’ అని తెలిపారు.
ఈ వివాదంలో అనూహ్యంగా వీణారెడ్డి అనే మహిళా అధికారి పేరు తెరపైకి వచ్చింది. ఆమె 2021లో యూఎస్‌ఎయిడ్‌ మిషన్‌ భారత విభాగం డైరెక్టర్‌గా భారత్‌ వచ్చారు. 2024 సార్వత్రిక ఎన్నికలు ముగిసిన వెంటనే తిరిగి అమెరికా వెళ్లిపోయారని బీజేపీ ఆరోపిస్తోంది. ఆమె ఆంధ్రప్రదేశ్ మూలాలు కలిగిన వ్యక్తి అని, అమెరికా మాజీ రాయబారి ఎరిక్ గార్సెటీతో కలిసి పనిచేసిన అనుభవం ఉందని బీజేపీ రాజ్యసభ సభ్యుడు మహేశ్ జెఠ్మాలనీ వెల్లడించారు.
యూఎస్‌ఎయిడ్‌ నిధుల అంశంపై కాంగ్రెస్, బీజేపీ మధ్య మాటల యుద్ధం కొనసాగుతోంది. కాంగ్రెస్ ఈ నిధులపై ప్రభుత్వం శ్వేతపత్రం విడుదల చేయాలని డిమాండ్ చేస్తోంది. బీజేపీ దీనిని కాంగ్రెస్‌పై రాజకీయ ఆయుధంగా వాడుకుంటోంది. భద్రతా సంస్థలు దర్యాప్తు చేస్తున్నందున త్వరలో మరిన్ని వివరాలు వెల్లడి కానున్నాయి. ఈ అంశం భారత ఎన్నికల రాజకీయాలపై ఎంత ప్రభావం చూపుతుందో చూడాలి
